قصة سنة

موضوع: قصة سنة الخميس يوليو 07, 2011 2:51 am

[color=red][size=18]قصة سنة[/size][/color]

]color=black] نحنا يعني بشعبتنا عنا أساتذة يعني فيكن تقولو ظراف فيكن تقولو مناح بس اوقات اوقات يعني حسب ال mood
[size=18]رح بلش بالأساتذة لأنو شخصيتن بتكون طاغية عند البنات بشكل عام يعني
أستاذ المادة الرئيسية يلي بترسب ويلي بيحلف وبيتوعد و بيقرر وبيفصل وبينصح وبيرشد وبيبهدل وهو واقف وكانو شي
شرطي او شي حارس هي هي صفات استاذنا( معاذ)أستاذ العربي
يلي بيكفيك تقول اسمو لحتى البنات يجنو ويقولوا ياااااي عندكن معاذ نيالكن والله على شو مابعرف وماكنت اعرف او افهم
يعني هو بضل حاسس حالو أنو شي شغلة أو شي واحد نازل من الفضاء مثلا وما في متلو على وجه المعمورة
بس شو بدكن بالحكي ظريف أوقات ......[/size].....[/color]
هلق استاذنا( منذر) استاذ الأنكليزي هي المادة بقى ما حدا بحبها عنا بالصف الأستاذ لحلو بيشرح ولحلو بحل وعلى اساس
ها نحنا عم ننتبه مع انو كل بنت بتكون شاردة ابصر وين
وقال بيعطينا وظيفة ياحرام اوقات بزعل عليه هو كتير منيح وشرحو كتير منيح
بس إذا اجا وكان حاطط العقدة الله يعينكن وإذا كان مروق عملي شو مابدك ومابيحكي شي ما قلتلكن القصة قصة mood
Iهلق رح بلش بأستاذ الفلسفة (انطون) اخ خ خ خ
الفلسفة شغلة كبيرة وبس يجي الأستاذ يعني اجا الموت اجا الملل هو كتير منيح شرحو بس هالزلمة عندو طاقة رهيبة
مابيتعب ابدا وبضل يشرح ويشرح وإذا بدك بعيد الدرس ميت مرة ومابمل( دقو على الخشب)

منروح على الانسات ورح بلش بالأنسة ليلى هي بالقمة التاريخ معها بتحسو شي بجنن وخصوصا بس تقول كلماتها يلي بضحكوا
وطريقة إيمائاتها وتمثيلها للشخصيات يلي بدور حولها الدرس أوقات بتطلع من كل الدرس لحتى تحكيلنا شي موقف
صار معها أو شي حادثة وبس ترجع للدرس بتقول (سكري باب اسطنبول يابنتي ويالله)
انسة الفرنسي (هيفا) هيفا حصتها حلوة يعني فيك تعمل شو مابدك وشرحها منيح وهي انسة عنجد منيحة وحبيت الفرنسي من وراها
بس يعني عندها مأخذ يعني بتجي الله وكيلكن من أول دقيقة بالحصة وهيك على هالسحبة لأخرها وأكره ماعليها انو حدا يقلها بيكفي او بلا درس وبتقلك يوه بلا درس مع نبرة صوت عالية
مع انو كنا متأكدين انو الفرنسي أول مادة رح تخلص وهيك صار
انسة الديانة (ريما) كمان منيحة وكمان اكره شي عليها انك تقلها بلادرس على قولة يابنات مابصير ويابنات لازم نلحق
ويابنات لازم تدرسوا وبتضرب أمثلة بفلان وعلان وشي كان وشي ماكان واصبر إذا فيك تصبر (وإن الله مع الصابرين)
انسة الرياضة والله مابعرف شو اسمها اتصوروا
بس المهم بتشبه كل شي إلا انسة الرياضة خصوصا مع البنطال الجينز والكعب العالي والصفارة فوقها وكمان أكره شي عليها تشوف شي بنت مو لابسة لباس الرياضة أو تقلها بلا مانلعب أو تعبنا
انسة القومية (ايمان) هي إجتنا جديد وعينكن ماتشوفها كمان بتشبه كل شي إلا الأنسة لا صوت ولا صورة ومو قادرة
تضبط حالها لحتى تضبط شعبة ادبي كاملة وخصوصا شعبتنا لأنو شعبتنا كتير كتير هادية
منشان هيك قررت تعطينا 3 دروس 3دروس بكل حصة مع اني كنت واثقة انو كلن رح يكونو مقررين علينا وهيك صار وما انشرح ولا درس قومية
وختامها مسك مع انسة الجغرافيا (اولغا)
خليتها للأخر لأنو قد ماحكيت عنها مارح أخلص وقد ماوصفت مارح وصل ليلي لازم وصلو
حصة الجغرافيا كانت حصة فراغ الانسة على اساس ها بتشرح ونحنا على اساس منفهم (بس ياقلبي لا تتعب قلبك)
وكل الضجة بتكون بحصتها وكل حصة لازم شي حدا يتبهدل أويكتب تعهد أو ينفصل بأسوأ الأحوال يعني
وأخر الشي قررت انستنا
أنو تعطي الدرس لخمس ست بنات بتعتبرن عم ينتهبهوا معها و الخرائط بتقول عنن انو هنن تضيع وقت يعني مافي داعي
لحتى الواحد يتعزب ويرسم (حكيمة) وإذا رسمت مصورات الله لا يورجيكن تحفة فنية
وبتقول انو كل واحد لازم يأدي واجبو ونحنا عنا مانفهم ( عنا يعني عمرنا بس بلهجتها)
وهي عم تأدي واجبها وتنام مرتاحة ولا كأنو شي 80 بنت عم يدعو عليها

على كل حال هي اساتذتنا حلوين يعني مهضومين وبكرى رح نرجع نتذكرن ونتذكر الفصول يلي صارت بحصصن ونضحك
ونضحك
ورح نقول ياريت ترجع شي 45 دقيقة من شي حصة أي استاذ لحتى نرجع نحضرها من جديد ونعيد هاد الشعور

يلي كتبتبو مابيندرج ابدا تحت اسم عدم الاحترام ومن نضل منقول (قم للمعلم وفه التبجيلا كاد المعلم أنويكون رسولا )
بس ياعمي مو كل الأساتذة نفس بعض عندكن الأنسة شام مثلا كنت موت على حصص الجغرافيا والتاريخ عندها وبالتاسع حبيتهن بسببها
وهاد مو تمسيح حوخ بس هاد الحق ومو بس انا بشهد بها الشي
بس كتبت لحتى ورجيكن انو مو دائما الحق على الطلاب كمان في حق على الأساتذة كمان

عطوني رأيكن بقتي وبأساتذتي

عدد المساهمات : 239 تاريخ التسجيل : 07/08/2010

انسة شام اوعى تخبري الأساتذة بلي كتبتو ها
مو منشان شي بس لأني عم احسب حساب خط الرجعة
يعني بلكي رسبت رح ارجع تحت رحمتن هههههههههههه

موضوع: رد: قصة سنة الخميس يوليو 07, 2011 3:13 am

ههههههههههههههههه ولك انتو مو شي ادام الشباب
قصة حلوة عنجد انا بتمنى ترجع ولو 10 دقائق من الدراسة
بالحصص يلي بتضحك

موضوع: رد: قصة سنة الخميس يوليو 07, 2011 3:19 am

يالله انا مابحب اتذكرن كلن مئتين
بس نيالكن على هيك اساتذة
مو متل لأستاذ بسام الله لايوجهلو الخير

موضوع: رد: قصة سنة الخميس يوليو 07, 2011 3:37 am

ههههههههههههههههه ولله زكرتيني بايام المدرسة كنت اضيا يا مألعة يا هربانة ما كنت احضر غير فيزيا وعلوم
وكون نايمة فيون يا ريت ارجع للمدرسة ولله احلى من الجامعة بمليووووووووووووون مرة

موضوع: رد: قصة سنة الخميس يوليو 07, 2011 2:17 pm

هههههههههههههههههههههه
موضوع رهيب بكرى انشالله لخلص أنا ببعتلكن صورة طالب العلمي المعتر مع اساتذتو
يلي مضروب فيهن بحجر كبير ما بعرف ليش
يسلمو vivo على الموضوع التحفة

موضوع: رد: قصة سنة الخميس يوليو 07, 2011 8:22 pm

شو مشان الآنسة شام ... ما بدردسكن ولا أنتو بغير مدرسة ؟؟؟

بس والله فصفصتي الأساتذة واحد واحد وبالتفصيل ,, يعني لو بتنتبهي عالدرس
قد نص ما بتنتبيهي عليهن كنتي طلعتي الأولى .ههههههههههههه

موضوع: رد: قصة سنة الخميس يوليو 07, 2011 8:24 pm

ههههههههههههههههههههههههههههههههههههههههه ولك هههههههههههههههههههههههههه
والله معك حق يا عالم

عدد المساهمات : 239 تاريخ التسجيل : 07/08/2010

شو قصدكن لا تاكلو همي
انا بلحق على كل شي يعني بنتبه ع الدرس وبشاغب وباكل وبشرب وبلعب وكل شي
شاطرة انا شو مفكرين لكان

موضوع: رد: قصة سنة الجمعة يوليو 08, 2011 1:30 am

ولله كلامك صح 100% بقولوا انه الحق ع الطلاب كتير ومافي عندون انه الحق عليون
عنجد موضوع كتير مميز وملفت للنظر مشكووووووووووووووووووووورة فيوليت Smile

موضوع: رد: قصة سنة الجمعة يوليو 08, 2011 1:50 am

اول الشي شكرا انك حكيتي كلمة حلوة بحقي حتى لو كانت مجاملة وكنت بتمنى توصفي حصتي مزبوط مشان اعرف كيف بتفكروا او شو بتفضلو

ما علينا كل الاساتذة والانسات يلي حكيتوا عنن هنن زملاء واكيد الحكي ما رح يوصل واذا وصل فأكيد مو من عندي لان انا ما عاد الي اي علاقة باي مدرس او مدرسة بمدرستكن والحمد لله

والموضوع حلو وظريف بدنا نشوف اساتذة العلمي بقى يعني الرياضيات والفيزيا والعلوم وين جماعة العلمي يخبرونا

اما من جهة انو مو دائما الحق الطالب فيمكن معك حق بس كتير بسيط

يعني أنا برأيي انو الطالب هو الاساس اذا كان مهتم رح يتأقلم مع الاستاذ مهما كان المود تبعو فأنا بعرف مثلا الانسة اولغا مع احترامي الشديدي الها معلوماتها كتير قيمة بالجغرافيا واحسن من الانسة يلي قبلها الله ييسرها ما في داعي نذكر اسمها بس المشلكة انو انتوا خلص حطيتو ببالكن انو ما بدنا نفهم وانو هية ما بتفهم بس يا رتى جربتو شي حصة تقعدوا وتلتزمو بالهدوء وتحاولوا تهتموا بالحكي يلي عم تحكي ؟؟ أنا متأكدة انو لأ لان انتوا حكمتوا قبل ما تجربوا

وطبعا الكلام ممكن ينقاس عالبقية مع انو عندي بعض التحفظات بس رح احتفظ فيها لنفسي

عفوا طولت عليكن

عدد المساهمات : 239 تاريخ التسجيل : 07/08/2010

شكرا انسة ع المرور بس كلامي بحقك ابدا مو مجاملة
ويمكن يكون كلامك صح منشان الانسة اولغا بس هي عنجد ماكانت تشرح لأنو المديرة عطتها البكلوريا
وهي ماكان بدها منشان هيك انا من وجهة نظري ما ظلمتها لأنو عانيت كتير بدراسه الجغرافيا
ومع هيك انضربت فيها ضربة مرتبة